VIT SKULU TRÚGVA UPP Á TAÐ

⚽️: Betrideildin: AB 🆚 HB

⏰: Sunnudagin 27. august klokkan 15:00

🏟: Skansi Arena, inni í Vika á Argjum

Vit fingu sum vátan vøttin á Eiði farna vikuskifti, tá vit fóru til hálvleiks aftanfyri 4-0 og at enda taptu 4-1 ímóti EB/Streymi. Í roynd og veru skaptu vit nokk av málmøguleikum í hinum endanum, men har vóru okkara tíverri ikki líka neyvir sum sundalagsmenn, ið gagnnýttu okkara minni góða verjuspæl at avgera dystin í fyrra hálvleiki.

Uppgávan gerst ikki lættari nú, tá grannarnir úr HB koma á vitjan. Havnamenninir hava fingið fulla úrtøku og skorað heili 15 mál í teimum trimum dystunum, sum teir hava spælt eftir summarsteðgin. Herfyri taptu vit óneyðuga stórt í Gundadali, 5-0, so vit vita, at vit skulu spæla ímóti einum sera sterkum mótstøðuliði.

Vit kenna okkara støðu. Stigatalvan lýgur ikki, og fýra stig eru upp til niðurflytingarstrikuna. Vit hava tó mangan verið í hesum dýkinum áður og vita, hvussu skjótt tað kann ganga í fótbólti. Í morgin væntar ongin, at AB megnar at stjala stig, men tað er okkara uppgáva og ábyrgd at trúgva upp á tann møguleikan, sum er, tí hann er har.

Um hesa tíðina í fjør vóru vit eisini undir niðurflytingarstrikuni, tá tað brádliga eydnaðist at vinna 2-1 ímóti HB á heimavøllinum í Vika, og hesin sigurin legði lunnar undir ein rimmar endaspurt, sum at enda tryggjaði okkum sætið í deildini. Tað hevur borið til fyrr, so tað ber sanniliga eisini til nú.

Vit vilja enn einaferð heita á okkara trúføstu viðhaldsfólk um at møta manssterk til grannadystin í morgin.

Og so ynskja vit okkara monnum bestu eydnu.

KOM SO, AB!!! 🩵♥️