TVEIR SPÆLDU SÍN DYST NUMMAR 100

Beint fyri summarsteðgin meldaði AB seg av álvara inn í kappingina við einum 2-0 sigri ímóti 07 Vestur á heimavøllinum inni í Vika. Við sigrinum eru ikki meira enn fýra stig upp til niðurflytingarstrikuna, og harvið kunnu vit siga, at vit hava skapt okkum ein fínan møguleika at yvirliva í deildini, hóast tað hevur sæð rættiliga vónleyst út ein stóran part av fyrru hálvu.

Ein av okkara heilt góðu árgangum er árgangur 1998, har fleiri leikarar hava spælt á besta liðnum. Tveir av hesum eru Jákup Pauli Breckmann og Teitur Debess Olsen, sum í dystinum ímóti 07 Vestur báðir spældu sín dyst nummar 100 á besta mansliðnum.

Jákup Pauli Breckmann kom aftur úr útlegd í HB í 2018, og síðani er hansara leiklutur bert blivin størri og størri á AB-liðnum. Í dag er høgri bakkurin liðformaður á øðrum ári, og hann er eitt av álitunum á okkara liði.

Teitur Debess Olsen hevði eitt serliga gott kappingarár í fjør, har hann gjørdist toppskjútti hjá AB við seks málum. Vongurin hevur spælt við í øllum dystum í ár, og hóast hann ikki kom inn ímóti 07 Vestur fyrr enn í yvirtíðini, so megnaði hann at vinna liðnum eitt brotsspark mest sum beinanvegin eftir, at hann var komin á vøllin.

Hetta brotssparkið tók Bjarni Skála heldur óvæntað, og hóast tvær royndir skuldu til, so fór bólturin í málið. Hetta var fyrsta málið hjá Bjarna í Betrideildini. Samstundis var hetta eisini dystur nummar 130 hjá Bjarna á besta mansliðnum (í øllum kappingum), og harvið eru bert átta spælarar, ið hava spælt fleiri dystir enn Bjarni á besta liðnum hjá AB.

Vit ynskja Jákupi Paula og Teiti til lukku við dysti nummar 100, og so ynskja vit eisini Bjarna til lukku við fyrsta málinum í Betrideildini.

Fyrireikingarnar til seinnu kappingarhálvu eru nú byrjaðar. Eins og undanfarin ár verður okkara fyrsti dystur í seinnu hálvu spældur 27. juli á Skansi Arena, tá ið B68, sum er liðið fýra stig framman fyri okkum, kemur á vitjan inni í Vika. Ein sera týdningarmikil dystur, har vit kunnu skapa háspenning í niðurflytingarstríðnum við einum sigri.

(Kelda til hagtøl: FaroeSoccer)