NIÐAN Í GUNDADAL AT ARGA GRANNARNAR

⚽️: Betrideildin: HB 🆚 AB

⏰: Sunnudagin 6. august kl 15:00

🏟️: í Gundadali

Dystarskráin hevur verið í lagaligara endanum síðstu tíðina, men í morgin stendur ein av heilt truplu uppgávunum fyri framman, tá leiðin gongur niðan í Gundadal, har HB tekur ímóti.

AB’arar fingu eina heilt góða ólavsøku, ið bleiv skotin í gongd tann 27. juli við einum sannførandi sigri ímóti B68 inni í Vika. Hetta var ein ómetaliga týdningarmikil sigur, sum ger, at nú er av álvara blivið áfast millum liðini í niðaru hálvu. Bert fimm stig eru frá AB á aftasta plássi við 10 stigum til TB á sætta plássi við 15 stigum. Harvið hava okkara menn skapt sær ein gyltan møguleika at varðveita sætið í deildini. Níggju stig eru komin burtur úr teimum seinastu 12 møguligu, og hetta gevur sanniliga AB-liðnum blóð á tonna.

Ongin ivi kann vera um, at HB er greiður favorittur til hendan dystin. Havnamenninir dystast við B36 um næstfremsta plássið í deildini, har tað er so langt upp til oddasessin og so langt niður til fjórða pláss, at hesi liðini neyvan fara at kappast um onnur pláss. HB-liðið er sterkt, men onnur lið hava eisini víst okkum, at HB er til at tosa við, og tí trúgva vit avgjørt upp á okkara møguleika.

Eitt er tó púra vist; skulu vit gera okkum nakrar vónir um at fáa stig í morgin, so skal eitt heilt annað avrik til enn seinast, tá vit spældu í Gundadali ímóti HB. Hetta var í triðja umfari, har úrslitið gjørdist 4-0 til HB í einum dysti, sum longu var avgjørdur í hálvleikinum. Nógv vatn er tó runnið í ánna síðani tá, so vit ivast ikki í, at okkara menn vísa seg í aðrari útgávu hesaferð.

Vit vilja heita á allar AB’arar um at koma niðan í Gundadal at stuðla. Nógv fólk møttu upp til ólavsøkudystin ímóti B68, og hesin stuðulin ger sanniliga stóran mun.

Og so ynskja vit sjálvandi eisini okkara monnum allar bestu eydnu.

KOM SO, AB!!!