KUNNU FÁA SAMBAND VIÐ STRIKUNA

Eftir, at kappingin hevur ligið í dvala síðani 1. juli, skulu okkara menn aftur í eldin í morgin. Eins og vanligt verður ólavsøkudystur inni í Vika 27. juli, og hesaferð er mótstøðuliðið B68. Og stigatalvan ger sítt til, at hetta nokk er at meta sum týdningarmesti dystur higartil í ár.

Við sigrinum ímóti 07 Vestur beint fyri summarsteðgin hava vit nevniliga fingið samband við niðurflytingarstrikuna, har B68 í løtuni er júst røttu megin hana. Fýra stig skilja AB á sjey stigum og B68 á 11 stigum undan dystinum í morgin, og harvið er lagt upp til eitt satt botnbrak, har vit hava møguleikan at minka munin til toftamenn niður í bert eittans stig við einum sigri.

B68 hevði ivaleyst ætlað sær meira í landskappingini í ár enn tað, sum higartil er komið burturúr. Í vetur styrkti B68 seg væl á pappírinum, men enn hava avrikini ikki rokkið til meira enn eitt 8. pláss á stigatalvuni. Tó kunnu toftamenn gleða seg um gongdina í steypakappingini, har B68 stendur við meira enn einum beini í steypafinaluni eftir at hava vunnið fyrra hálvfinaludystin 3-0 á útivølli ímóti EB/Streymi.

Okkara menn eru so avgjørt heldur ikki nøgdir við samlaðu gongdina í ár, nú vit eru aftastir í deildini. Við góðu gongdini fyri steðgin hava vit tó fingið samband við hini liðini, sum ger, at vit hava skapt okkum ein realistiskan møguleika at varðveita sætið í Betrideildini. Tað er tí eitt AB-lið við sjálvsáliti, sum fer inn til dystin í morgin.

Dystirnir ímillum AB og B68 plaga tó at vera javnir og tættir, og helst verður onki undantak í morgin. Vit vóna at síggja nógvar AB’arar til hendan týdningarmikla dystin, sum hevur sera stóran týdning, um vit skulu gera okkum vónir um eisini at spæla í Betrideildini í 2024.

Í samband við, at talan er um ólavsøkudyst verður somuleiðis spælt um eitt steyp. Endar dysturin við javnleiki skal brotssparkskapping avgera, hvat lið fær steypið.

Vit ynskja okkara monnum bestu eydnu í morgin!

KOM SO, AB!!!