KUNNU FÁA EB/STREYM AFTUR

⚽️: Betrideildin: AB 🆚 EB/Streymur

⏰: Leygardagin 12. august kl 14:00

🏟️: Skansi Arena, inni í Vika á Argjum

Eftir søta ólavsøkusigurin ímóti B68 komu vit so dyggiliga niður á jørðina aftur, tá ið tað endaði við einum tapi á heili 5-0 ímóti HB farna sunnudag í Gundadali. Tapið var óneyðuga stórt, men tó ikki so óvæntað, um hugt verður eftir stigatalvuni. Vit hava nú lagt hendan keðiliga dystin aftur um bak og hava nýtt hesa vikuna at fyrireika okkum til týdningarmikla heimadystin ímóti EB/Streymi í morgin.

Onkuntíð er kappingarskráin at síggja til eitt sindur merkisverd, og hetta ger seg galdandi nú, har teir næstu tveir dystirnir hjá okkara monnum eru ímóti EB/Streymi. Fyrst í morgin, tá vit hava heimavøllin, og síðani sunnudagin 20. august, tá vit vitja í Hólmanum á Eiði.

Onki er at siga til, at nógv stendur upp á spæl hesar báðar dystirnar. Stigatalvan sigur, at EB/Streymur er á 8. plássi, beint omanfyri niðurflytingarstrikuna, við 13 stigum, meðan AB hevur 10 stig á aftasta plássi.

Vit kunnu tó ikki gera annað enn at halda okkum til slitnu klichéina um at taka ein dyst í senn. Vinna okkara menn í morgin, so eru vit ájavnir EB/Streym í stigum. Hetta er ein gyltur møguleiki, sum vit eru noyddir at taka av.

EB/Streymur hevur síðstu árini víst seg at vera eitt lið, sum ofta vinnur sínar dystir ímóti nærmastu kappingarneytunum, tá ið mest stendur á. Í morgin ætla vit tó, at hetta skal verða øðrvísi, tí ætla vit okkum eisini at spæla Betrideildarfótbólt í 2024, so er ein sigur ímóti einum av nærmastu kappingarneytunum á heimavølli mest sum eitt krav.

Hóast hesin dysturin er leygardag ístaðin fyri sunnudag, sum okkara dystir vanliga eru, so vóna og vænta vit at síggja nógvar AB’arar dýkja á okkara menn til hendan týdningarmikla dystin. Tað hoyrdist góður stuðul úr bygdarskýlinum ímóti HB, hóast tað ikki gekk eftir vild á vøllinum, og hesin stuðulin ger sanniliga mun.

Vit ynskja okkara monnum bestu eydnu kl 14 á Skansi Arena inni í Vika í morgin.

KOM SO, AB!!! 💙❤️