top of page
  • Instagram
  • YouTube
  • Facebook

HETTA ER MØGULEIKIN

  • Writer: Argja Bóltfelag
    Argja Bóltfelag
  • Sep 16, 2023
  • 2 min read

⚽️: Betrideildin: AB vs TB


⏰: Sunnudagin 17. september kl 15:00


🏟️: Skansi Arena, inni í Vika á Argjum


Seks dystir eru eftir at spæla í Betrideildini, og vit mugu bara siga sum er; tað stendur á gomlum nøglum, og eftir fimm tap á rað eru seks stig upp til niðurflytingarstrikuna. Í morgin fáa vit tó ein gyltan møguleika at fáa samband við strikuna, tá ið TB kemur á vitjan. Júst TB er liðið, sum er røttu megin niðurflyting, og við einum sigri í morgin kunnu vit fáa samband við tvøramenn, so stigamunurin millum liðini minkar niður í trý stig, áðrennn endaspurturin í deildini skal setast inn.


Hetta verður tó, eins og allir aðrir dystir, ein sera trupul dystur. Tvøramenn hava víst seg at verið stinnir í ár, og júst í botndystunum ímóti kappingarneytunum hevur eyðkendi stríðsviljin hjá suðuroyingunum borið teir langt. Vit skulu tískil vera greið yvir, at dysturin í morgin verður ein sannur gysari, har TB’ararnir ikki fara at geva okkum nakað sum helst fyri onki.


Hóast okkara gongd ikki hevur verið góð í síðstuni, so vístu vit okkum sera væl fram í heimadystinum ímóti HB, har vit vóru á odda og við eitt sindur av hepni kundu stolið bæði eitt og trý stig. Soleiðis skuldi ikki verða, men við einum líknandi avriki og innsatsi í morgin, so ber avgjørt til at fáa fulla úrtøku í skjáttuna. Vit hava nógvar góðar leikarar á liðnum, og nú skulu teir allir vísa, hvat teir eru gjørdir av, tá kappingin skal avgerast í næstum.


Til ein slíkan dyst hevur tað heilt ómetaliga nógv at siga, at nógvir AB’arar og argjafólk leita sær niðan í Vika at dýkja á okkara menn. Tað er í støðum sum hesum, at vit øll skulu vísa, at vit standa saman um AB.


Vit síggjast til eitt brak av einum dysti á heimavøllinum, Skansi Arena, í morgin.


Og so ynskja vit sjálvandi okkara monnum allar bestu eydnu!


KOM SO, AB!!! 🩵❤️

Comments


bottom of page