top of page
  • Instagram
  • YouTube
  • Facebook

BÆÐI SPÆLA FYRI LÍVINUM

  • Writer: Argja Bóltfelag
    Argja Bóltfelag
  • Sep 23, 2023
  • 2 min read

(Mynd: Álvur Haraldsen/in.fo)


⚽️: Betrideildin: ÍF 🆚 AB


⏰: Sunnudagin 24. september kl 14:00


🏟: í Fløtugerði


Seinasta sunnudag tóku okkara menn sær so dyggiliga um reiggj við tryggum 3-0 sigri ímóti TB. Gamaní fingu vit onkra gávu frá mótstøðuliðnum, men teimum skal ein eisini gera sær dælt av, og tað gjørdu vit. Við sigrinum yvirhálaði AB mótstøðuliðið í morgin, ÍF, so tað nú eru fuglfirðingar, ið eru á aftasta plássi við 12 stigum, meðan vit nú eru á næstaftasta plássi við 13 stigum. Beint omanfyri niðurflytingarstrikuna er TB við 16 stigum, og tí stendur ómetaliga nógv upp á spæl fyri báðar partar í Fuglafirði í morgin.


Hetta er triði og síðsti dystur ímóti ÍF í ár. Fyrsti dysturin ímillum liðini, ið somuleiðis var í Fuglafirði, var í 2. umfari og endaði 2-0 til ÍF. Hesin dysturin var partur av einari sera ringari byrjan hjá okkara liði, sum ikki fekk gongd á málskjótingina fyrst í kappingini.


Aðru ferð liðini hittust var í juni, og tá fingu okkara menn loksins fyrsta sigur. Tá vunnu vit 2-0 við málum frá Briani Jacobsen og Dánjali Danielsen.


Onki er at siga til, at dysturin í morgin er nakað so heilt ótrúliga umráðandi. Vinnarin av dystinum fer at standa eftir við einari kenslu av, at hetta var eitt stórt fet ímóti yvirliving, meðan taparin fær at sanna, at tað verður tungt at yvirliva, um beinleiðis

kappingarneytarnir fáa trý stig. Onki verður avgjørt í morgin, men óansæð hvussu víkir og vendir, so betra vit munandi um okkara yvirlivingarmøguleikar við at koma heim aftur við øllum trimum stigum.


Felagið ger nógv burturúr, og í hesum sambandi koyrir fjepparabussur av AB-vøllinum kl 13:00, ein tíma fyri dystarbyrjan. Meira kunning um fjepparabussin er at lesa á Facebook-síðu felagsins.


Vit vóna at síggja nógvar litríkar og eldhugaðar AB’arar til hendan avgerandi dystin!


Og so ynskja vit sjálvandi okkara monnum allar bestu eydnu!


KOM SO, AB!!! 🩵❤️

Comments


bottom of page